Тыдзень педмайстэрства настаўнікаў пачатковых класаў
25.02.2022Тыдзень педмайстэрства настаўнікаў пачатковых класаў прайшоў ў дзяржаўнай установе адукацыі “Крываносаўская сярэдняя школа імя Героя Савецкага Саюза Рамана Навумавіча Мачульскага” з 21 па 25 лютага 2022 года.
Адкрыццё тыдня адбылося 21 лютага ў групе падоўжанага дня гульнёй-віктарынай “Наша здароўе – у нашых руках”. Выхавацель ГПД Якубоўская Крысціна Дзмітрыеўна арганізавала спаборніцтва дзвюх каманд: “Чысцюлі” і “Вітамінкі”. У ходзе гульні дзеці адгадвалі загадкі, чыталі вершы, рашалі лагічныя задачы. Школьнікі паказалі не толькі свае веды пра карысныя прадукты, але і пабывалі ў ролі акцёраў, спартсменаў, мастакоў.
У гэты ж дзень настаўнікам Назаравым Аляксандрам Мікалаевічам быў праведзены ўрок фізічнай культуры і здароўя па тэме «Баскетбол». У ходзе ўрока вучні ўдасканальвалі тэхніку вядзення, кідання і лоўлі мяча. Якасная падрыхтоўка настаўніка, разнастайнасць прыёмаў і метадаў, якія выкарыстоўваліся, узровень фізічнай падрыхтаванасці навучэнцаў дазволілі правесці ўрок на высокім узроўні.
22 лютага ў 4 класе прайшоў урок рускага літаратурнага чытання па тэме “Б.Заходер “Сморчкі”. Дзеці акунуліся ў атмасферу прыгажосці і мілагучнасці рускай літаратурнай мовы. Былі выкарыстаны розныя формы і метады работы з вершам: чытанне па ролях, слоўнае маляванне. Вучні пабывалі ў ролі герояў верша, характарызавалі падзеі, устаноўлівалі паслядоўнасць з’яў.
Настаўнік Сквярнюк Анжэла Сцяпанаўна правяла ў 2 класе ўрок беларускага літаратурнага чытання, у ходзе якога вучні пазнаёміліся з творам З.Бядулі “Гаспадарка”. Усе этапы ўрока былі цесна ўзаемазвязаны і плаўна пераходзілі адзін у другі. Дзеці з захапленнем выконвалі розныя віды заданняў, прапанаваныя настаўнікам: паўтаралі чыстаговоркі, дапаўнялі сказы, выразна чыталі, інсцэніравалі эпізоды.
24 лютага на ўроку матэматыкі ў 3 класе па тэме “Кіламетр” дзеці пазнаёміліся з новай адзінкай вымярэння даўжыні – кіламетрам. Падчас матэматычнага марафону, у форме якога прайшоў урок, вучні навучыліся выкарыстоўваць новую адзінку даўжыні: параўноўваць з іншымі велічынямі, рашаць задачы і выкарыстоўваюць “кіламетр” як адзінку вымярэння даўжыні ў розных жыццёвых сітуацыях.
Формы і метады работы, выкарыстаныя настаўнікам, спрыялі развіццю лагічнага мыслення, увагі, фарміраванню ў дзяцей цікавасці да ўрокаў матэматыкі, усведамленню важнасці гэтай навукі ў паўсядзенным жыцці.
25 лютага настаўнікам Іллюшчэняй Нінай Рыгораўнай праведзены ўрок навучання грамаце ў 1 класе па тэме «Гукі [б], [б']. Літара Б/б». Актывізацыя дзейнасці першакласнікаў умела ажыццяўлялася настаўнікам праз сістэму пытанняў, розных формаў арганізацыі работы, выкарыстанне праблемнай сітуацыі, элементаў займальнасці і нагляднасці, прымяненне здароўезберагаючых тэхналогій. Змест заданняў садзейнічаў выхаванню любві да Радзімы, беражлівых адносін да прыроды роднага краю.